BAHAN SERMON HKI DAERAH I SUMATERA TIMUR I MINGGU IX DUNG TRINITATIS 02 AGUSTUS 2026

 

BAHAN SERMON HKI DAERAH I SUMATERA TIMUR I

MINGGU IX DUNG TRINITATIS 02 AGUSTUS 2026

EV. JOSUA 21: 43 – 45                                  EP. 2 KORINT1: 15 – 24                     SP: PODA 12: 22

Thema/ Ojahan: Semua Janji TUHAN dipenuhi (Digohi Jahowa do saluhut angka bagabagaNa)

========================================================================

 

I.                    PATUJOLO

Adong pandohan di hita halak Batak “Molo horbo, talina do sitiopon, jala molo jolma hatana do sitiopon.” Pandohan on patuduhon hinaarga ni “hata” di halak Batak. Ai tarida do kepribadian ni sada sada jolma sian hata na nidokna nang pangulahononna songon hata na nihataanna. Molo saurdot hata dohot pambahenan, ido hataridaan ni jolma na memiliki integritas. Ido umbahen adong pandohan: “Hata do parsimboraan” lapatanna ia hata na ruar sian pamangan, marisihon sumpah, janji manang hatontuan na mansai togu jala gomos tiniop songon “pegangan hidup”. Alai ala ni godang ni parungkilon nang hamaolon ni ngolu, jotjot do jolma I gabe dang saurdot hata tu pangalahona. Laos I do patuduhon keterbatasan ni jolma, manang hagaleonna.

Marhite turpuk jamita di Minggu on, naeng sigatanta sian Buku Josua hombar tu ojahan ni jamita “Digohi Jahowa do saluhut angka bagabagaNa.” Bagabaga ni Debata tu si Abraham,  mangalehon tano Kanaan tu ibana sahat tu pinomparna tangkas mai tarsurat di buku ni si Josua on. Laos gabe hataridaan hagogok ni bagabaga i. Satia do Jahowa di angka padanNa, hombar naung nihatahonNa tu si Abraham, Isak nang si Jakob. Dilehon ibana jaminan pandonganionNa, na mangalehon gogo, huhut panjouonNa tu bangsoNa asa mangolu hombar tu Hata ni Jahowa. Ala nunga tarihot nasida di sada padan, dina targoar nasida bangso parpadanan.

 

II.                 HATORANGAN NI TURPUK

Mamuhai hatorangan ni turpuk on, adong do piga catatan awal. Parjolo, Frasa “Padan ni Jahowa (Janji Tuhan)” mangihuthon “terminologi” bahasa Heber klasik, dang adong hata na khusus laho patoranghon hata janji / padan. “Padan ni Jahowa” dipapatar marhite “Firman” atau kata kerja dabar (דָּבַר - berbicara) dan 'amar (אָמַר - berkata). Dalam Ibrani Modern, kata untuk janji adalah Havtacha (הַבְטָחָה). Kata havtacha mencerminkan sifat dasar dari sebuah janji itu sendiri: sesuatu yang dapat dipercaya, memberikan rasa aman, serta menghadirkan ketenangan bagi orang yang mendengarnya. Paduahon, Hata Digohi (Ditepati / Digenapi): Kata Ibrani yang sering digunakan untuk menggambarkan janji yang ditepati adalah Qum (קוּם) yang berarti "membangkitkan" atau "menegakkan", dan Male (מָלֵא) yang berarti "memenuhi". Patoluhon, Frasa  “Ikatan Janji”: Istilah teologis yang paling sentral untuk ikatan janji Allah adalah Berit (בְּרִית).

Turpuk jamita on papatarhon hataridaan ni hasatiaon ni Jahowa manggohi padan manang bagabagaNa tu bangso Israel. Sian turpuk on boi idaonta Jahowa naung mangalehon tano Kanaan hombar tu padanNa tu ompunasida Abraham, Ishak, Jakob. Tutu ma dang holan marpadan Jahowa, alai satia do Ibana manggohi padanNa. Hatiha naposoNa si Josua mandok paboa sian sude na uli, na arga, na denggan na dipadanhonNai nunga digohi, ido hataridaan ni hasatiaonNai. Laos on do pataridahon hadebataonNa na manongtong (abadi), na patut gabe sipangasahononhon saleleng-nilelengna. Andul do jotjot maralo tu hadirion ni jolma na sai jotjot manimbil, munggil-unggil, mangose padan. Alai nang pe jotjot dang satia bangsoNai saleleng pardalananna (Misir tu tano Kanaan), molo Jahowa manongtong do satia, na sai tongtong mangalehon hademakon, nang ragam ni pasupasu tu bangso Israel, pasupasu na godang I, na so habilangan i.

Josual 21:43, Jahowa mangohi padanNa tu si Abraham-Ishak-Jakob, ompu ni bangso Israel, paboa nasida, pinompar ni ompunasida I,  gabe panean di tano parpadanan i. Di ayat on, tangkas dipabotohon pangalehonon ni Jahowa ima tano Kanaan songon naung niuarihonNa tu ompu nasida. Sian on tangkas tarida hasatiaon na manongtong dina manggohi padanNa, nang pe marhite godang hamaolon nang partongtangon na ganjang.  Suang songoni ma hagogok ni padani patuduhon hagogon nang holong satia ni Jahowa na mangalehon hamonangan nang sumarihon nasa na ringkot di ngolu ni bangsoNai hombar tu sangkap hatuaon ni Jahowa. On pataridahon hasatiaon ni Jahowa naso mubauba, na so olo munggil  nang pe pangalaho ni bangsoNai jotjot patuduhon pangalaho na tangkang, na sai jotjot dang satia.

Sasintongna konsekwensi jolma naung tardok bangso ni Debata, ingkon boi mangihuthon pangalaho, parpambahenan nang sifat ni Jahowa na satia di padanNa. Songon Jahowa na satia di padanNa, suang songon I ma nian pangalaho ni bangsoNai. Marhite na sai manghasiholi parsaoran, pauliulihon relasi na manongtong tu Jahowa. Ingkon dirajumi bangsoNai do marhite I do tarida songon bangso na niasianNa. Ido na niigil ni Tuhan I, songon sada hataridaan “ketaatan” di parpadanan naung niihot antara Jahowa dohot bangsoNa.

Ayat 24 turpuk on, patuduhon Jahowa mangalehon hademakon (keamanan) tu bangsoNa sian sude musu nasida. Sian on tarida, Jahowa dang holan manggohi mangalehon tano Kanaan, alai tong do dilehon hademakon nang pangalinggoman nang hasonangan so hariboriboan tu bangso na niasianNai. Panghilalaan sonang jala gok dame marlapatan, dang adong be ancaman sian musu na adong di humaliang nasida, ala Jahowa do na pasahathon angka musu ni Israel I marhite hagogonNa nag ok huaso i. Dang adong be sian sude musu nasida na boi manahan di adopan ni bangsoNai.

Ngolu na gok hadumaon, hadameon nang las niroha di tano na nilehon ni Jahowa, marlapatan ngolu na dao sian hatahuton, hagangguon jala boi mandai sian gogo ni tanoi, na mangalehon godang sian parbue ni naniula, marlopit ganda. Parngoluon na songoni  ma pataridahon hasatiaon ni Jahowa mangaramoti nang manarihon ngolu ni bangso Israel. Asa marhite parpambahenan ni Jahowa di tonga-tonga ni ngolu ni bangsoi, tubu ma roha mauliate, di sude pasupasu ni Jahowa naung sahat tu nasida ganup marsada-sada.

Ayat 25 turpuk on patuduhon tung mansai satia do Jahowa manggohi padanNa maradophon bangso na niasianNai. Mangalehon tano, hademakon nang hamonangan maralohon musu jala ngolu na marhasonangan nag ok dame dohot las ni roha. Sian turpuk on tangkas ma ia Jahowa dang hea dang manjadi sude na hea nipadanhonNa. Sai na saut do sude na nihatahon nang na dipadanhonNa. Sian on ma boi gabe ojahan ni haporseaon, pos ni roha ni bangso I di saluhut hata nang pambahenanNa. Jala hinorhon ni I, tubu ma roha mauliate nang pos ni roha gabe sipangoloi di hata nang hasatiaon laho mangoloi parenta ni Tuhan i.

Marhite ayat on, gabe sipaingot paboa padan ni Jahowa marlaku tu sude jolma na manghaporseai Tuhan I, dang holan bangso Israel. Adong sada jaminan, kepastian marposniroha angka na porsea I di haluaon nang panarihonon ni Tuhan I di panggulmiton ni parngoluon ni bangsoNa. Sian sifat ni Debata na boi pinangasahon, jala na hot satia rodi saleleng-lelengna dipatuduhon marhite na so adong padan, bagabaga na so digohi Tuhani. Sian on ma boi gabe patubuhon pos ni roha di angka na porseai, asa unang be ganggu molo pe sipata songgop parungkilon nang ragam ni hamaolon ni ngolu, ai adong Debata na satia laho mangurupi huhut mangalehon nasa na ringkot di parngoluonta.

Sada na ringkot na naeng pinahusorhusor marhite turpuk on, nang pe marpadan Jahowa mangalehon tano, ngolu na marhademakon, gok dame nang las ni roha jala marhamonangan maralohon musu, saluhutnai dang lias sian hasatiaon ni bangsoi laho mangoloi parenta ni Tuhan I, songon bangso naung tarjou, tarpili. Laos lobi sian I, naeng rajumanta paboa padan ni Debata I dang holan tu halak Israel, songon di partingkian ni si Josua, alai  dohot do halak Kristen di partingkian sinuaeng on. Gabe tauli do nang hita na targoar “Israel rohani angka pinompar ni si Abraham mangihuthon haporseaon tu Jahowa dibagasan Kristus Jesus (hagogok ni padan ni Debata).

 

III.               Sipahusorhusoron

Diparngoluonta siganup ari, hea do hita dibaga-bagahon donganta naeng lehononna sesuatu; hepeng, hadiah manang aha pe angka na arga. Ala bagabagai, tung las do rohanta umbegesa. Na marbagabagai boi doi dongan saripe, tondong, dongan saulaon  manang aleale. Molo diombas naung ditontuhon I, digohi dongan I baga-bagai, tung mansai las jala marolopolop do hita. Alai sabalikna molo dang saut, manang mangoes dongan na marbagabagai, tung na lungun do rohanta. Boi dohonon molo dongan jolma tung muramura doi marbagabaga, hira marhata manggang alai dang adong bukti manang realitana. Kondisi sisongoni ma patuduhon keterbatasan nang hagaleon ni hita jolma,

Alai andul sabalikna do molo di Tuhan i. Molo marbagabaga Tuhan I, sai na pasauthonNa doi. Di 2 Timoteus 2: 13 didok “So haposan pe hita, tong do haposan anggo Ibana; ai ndang tarsoadahonsa diriNa” (“jika kita tidak setia, Dia tetap setia, karena Dia tidak dapat menyangkal diri-Nya.” Turpuk jamita on ma sada sian buktina/ hataridaan hasatiaonNa manggohi bagabagaNa. Saut do tano Kanaan dilehon tu bangso Israel, nang pe jotjot bangsoi manundalhon Tuhan i. Saleleng dipardalanan dung bungkas sian tano parhatobanon Misir manuju tano Kanaan.

Songon bangso Israel najolo, hita pe sipata marpangalaho songoni. Nunga nian godang tahilalahon angka denggan basa ni Jahowa, alai bangkol dope mandok mauliate. Nunga nian paltak taida bahkan jotjot hita dipamonang Tuhan I di ragam ni partontanganta, alai sipata gabe tahilala ala ni gogonta sandiri boi hita monang manang marhasil. Marhite turpuk on, naeng adong sada evaluasi, panandaon diri dihita na tardok siihuthon Kristus. Kristus do hagogok ni padan, bagabaga ni Debata asa taruli haluaon nang ngolu na gok dame dohot las nirohanta. Ala ni I, tatiru ma hasatiaonNai, gabe jolma na satia ma hita laho mangulahon sude parentaNa, gabe jolma sipangoloi hombar tu angka tohonan naung tajalo be. Amen….

 

Tomuan Dolok, akhir Juli 2026

Pdt. Tumbur Siahaan.