Adven ke 2 Minggu 8 Des 2024

 

MINGGU, 8 DESEMBER  2024

ADVEN II  

 

EVANGELIUM: JESAYA 40: 1-5

PARADE MA DALAN DI TUHAN I

Pdt. Tumbur Siahaan, S.Th

I. PATUJOLO

Di Minggu Adven na paduahon on, sian Jesaya 40: 1 -  5, tarmasuk tu horong Jesaya na Paduahon (Bindu 40 – 60 : uju di habuangan Babel) gabe ojahan di hita laho manomunomu haroro ni Tuhan siboan haluaon i. Borhat sian na nialaman ni bangso Israel uju di habuangan Babel, ro panurirang Jesaya mamboan barita nauli tu nasida. Nang pe sangombas ingkon aeon nasida uhum sian Debata di na tarbuang i nasida alai sai mulakulak do holongna tu bangsona i. Tangkas ma idaonta di turpuk on di na sinuru ni Debata panurirang Jesaya pasahathon tona tu bangso i, asa diapuli.

Boasa ingkon diapuli? Ala nunga tung bagas jala posa parniahapan nasida uju na tarbuang i. sian rura hasusaan i, joujou nasida tu Debata asa dipalua. Ditangihon Debata do anggukangguk nasida i. Hira na so adong be arga nasida, songon hatoban na tarante, na so adong be kebebasan laho mandalani parngoluonna. Songon jolma na tongon mandalani uhum di penjara. Na sai paimaimahon barita haluaon, bebas sian penjara nama na sai dipaimaima.

Di situasi panosak ni ngolu sisongoni ma ro Debata marhire naposona mamboan barita las ni roha. Sangkap hatuaon do sian Debata, nang pe marhite linsing-linsing sangombas ingkon aeon ni bangsonai di habuangan i. Sai na umbalga do holongNa martimbanghon rimasna. Beha do respon/ alus ni bangsoi laho manomunomu sangkap hatuaon na sian Debata i?  Ido na naeng idaonta di turpuk jamita on.

 

II. HATORANGAN NI TURPUK

Pandelean, marsak dohot gondok ni roha, songon i ma parngoluon ni bangso Israel uju di habuangan Babel. Tung tangkas do mamoto jala manghilala Debata di hapoporsuk ni ngolu ni bangsonai. Nionjar ni holongna na so hasuhatan i, didok ma tu naposona Jesaya “Apuli..... apuli.....” ma bangsoki. Sian Debata do ro pangapulon i. Marhite panurirang Jesaya disuru Debata ibana asa mangapuli. Asa dung tarapul bangsoi mangolu ma nasida dibagasan panghirimon, sahat ma tu nasida hatuaon na sian Debata. Hatuaon na sian Debata i, janghonon nasida ma dibagasan roha na rade laho mangulahon tona na pinasahat ni naposo ni Tuhan i.

Marhite hata pangapulion na mandok: “nunga marujung parungkilonna”. Parungkilon ni ngolu nasailaon na songgop tu bangso i dipaujung Tuhan i. Dang ala ni huaso ni jolma (isarani Raja Koresy) na paluahon, alai Debata sandiri do. Holan parhitean do jolma i dipangke Tuhan i pasahathon na sinangkapan ni Debata. Ala holan Tuhan i do na marhak mandok “nunga salese dosa” ni bangso i. Laos gabe silompit muse jaloon nasida pasupasu sian Tuhan i, singkat ni dosa nasida i.

Songon sada patujolo do hata na pinasahatna marhite naposona si Jesaya. Naposo na gabe manuhuk sitaonon ala ni dosa ni bangsona i, na martudutudu tu Mesias na gabe sitobus dosa nasida. I ma dihadirion ni Tuhan Jesus di Padan na Imbaru, na gabe hagogok ni hata panurirang di Padan na robi. Marhite Ibana ma taruli haluaon nasa jolma, ndang holan bangso Israel alai tung saluhut do nasa na tinompa ni Tuhan i, paluaonna sian gomgoman ni dosa.

Saleleng di habuangan i, gombaran ngolu nasida songon duhut-duhut na mahiang, mura matutung, songon bunga naung maheu, melos songon bulungbulung naeng maturtur. Alai marhite hata na pinasahat ni naposo ni Tuhan i naeng diapuli huhut dipauli asa gabe sada bangso na marbungaran, bangso na maduma, na merdeka na pinajae ni Debata. Marhite hata ni Debata na gok huaso i, na so tartaluhon manang aha pe, ima gabe pangapulon nang pauliulihon nasida na sasintongna. Alani i diarahon do bangsoi asa mangungkap roha, ate-ate nang pingkiranna gabe hasahatan ni Hata i.

Asa boi sahat hatai tu nasida, didok di ay. 3 asa paulihon dalan di Jahowa.  Dang boi martopap molo sambola do tangan, ingkon marsitomuan do dua tangan asa boi martopap. Ala naeng ro nama Tuhan i mamboan haluaon, ala ni i ringkot paturehon dalan. Lapatanna, taungkap ma roha nang pingkiranta rodi sude gulmit ni ngolunta gabe dalan ni Tuhan i asa taruli hita nang humaliangta dihaluaon i. Asa songon umpama panabur na manaburhon boni di tano na denggan. Gabe patubuhon suansuanan na bagas marurat tu toru jala marbulung tu ginjang na ramos parbuena.

Di ay. 4, didok “ingkon gohan do nasa rura....”. Borat ni sitaonon ni bangso i uju di habuangan mambahen nasida madabu tu pandelean, mago panghirimon, gabe pesimis. Nang pe sasintongna sangkap ni Debata manguhum masida laho papitahon haporseaon nasida, ndang laho pamagohon nasida. Parrohaon nasida na digombarhon songon “rura”i ingkon nigohan. Marhite aha manggohi i? Marhite “hata” na sian Tuhan i. Suang songon na masa diparmulaan dipanghobasion ni Tuhan Jesus di tonga-tonga ni bangso i, jumolo do joujou si Johannes Pandidi (Markus 1: 2-3) laho paturehon dalan sidalanan ni Tuhan i, Sipaluai.

Boi do muse panghorhon ni borat ni sitaonon songon na niadopan ni bangso i, gabe jumpa pangalaho “ginjang ni roha”/ sombong. Parrohaon na songoni di turpuk on digombarhon songon ”dolok” dohot “buntulbuntul. Ido umbahen didok asa parejeton ma angka dolok dohot buntulbuntul. Asa boi mangida jala mandai haluaon na sian Tuhan i, ingkon jumolo do parejeton dolok ginjang ni roha i. Haginjangon ni roha on tung patar do tarida di angka halak Parise di masa ni Tuhan Jesus manghobasi di tonga-tonga ni bangso i. Jotjot do dipaingot angka siginjang roha i, ima angka Parise, asa marhamubaon. Asa gabe serep marroha nasida, ala dang adong dasor ni jolma gabe ginjang rohana. Haserepon ni roha i, boi idaonta di pangalaho ni angka parroha sian purba na mamboan angka pelean sipelehonon nasida tu Jesus uju tubu di Betlehem.

Didok muse asa gabe hornop na marnangkok tuat, jala gabe rura tanggurung ni dolok. On ma gombaran ni pangalaho na so konsisten. Asing hata saonari asing muse hata sohotnai; lain di bibir lain di hati. Sipaubaon do pangalaho sisongon on. Ndang tarjalo ni jolma na marpangalaho sisongoni haluaon na sian Tuhan i. Sian na jolo sahat tu saonari sai jumpa do pangelaelaon tu angka siihuthon Tuhan i, na boi mambahen pangalaho na so konsisten. Ala ni ido diarahon panurirang Jesaya tu luhutan ni bangso i nang tu halak Kristen saonari asa unang mura hita meol-eol, moleng-oleng. Alai sai gabe paroha na tigor na so manimbil sian hasintongan na sian Tuhan i.

Asa sahat ma songon pangidoan ni Tuhan i, na tangkas taida di ay. 5 gabe patar ma hamuliaon ni Jahowa. Lapatanna, ingkon adong do siparadeon, sihobasan tanda panomunomuonta diharoro ni Sipaluai songon na di ay 3-4 di ginjang i. Adong respon sian na naeng dipalua i marhite na proaktif mangulahon parsuruon ni Tuhan i. Ndang holan tu bangso Israel na di habuangan i naeng patar hamuliaon ni Jahowa i, alai sahat tu angka bangso na asing pe. Ido umbahen dipillit Debata nasida asa boi do gabe parhitean ni Tuhan i papatarhon hamuliaoNa tu saluhut bangso.

Naeng songon alus ni naposo ni Debata di Jesaya 6:8 na rade mangulahon parsuru ni Tuhan i. songoni ma nang alusta. Sai na rade laho mangulahon parsuruon ni Tuhan i, songon hataridaan haundukon jala hasatiaonta songon sipangoloi. Ai diigil Tuhan i do sian bangsona, sian hita naung tinobus ni Kristus i asa boi hita gabe hapataran ni hamuliaon ni Jahowa marhite sandok panggulmiton ni ngolunta. Molo dung songoni boi ma idaon ni angka jolma na asing, laos gabe tartait mangihuthon  hita nang na tahaporseai.

 

III. PANIMPULI

Uju manghirim hita di balga ni pasupasu nanaeng jaloonta hombar tu panomunomuonta di harorona muse, sai tajouhon ma “apuli... apuli au Tuhan. Holan pangapulion sian Tuhan i do na gabe pangapul na sumurung na tuk margogoihon hita manahan sian ragam parungkilon ni ngolu na taadopi. Molo pangapulion sian dongan nang aleale sai na terbatas doi. Alai molo na sian Tuhan i marhitehite hatana na manggohi roha nang pingkiranta tarapul ma hita gabe sai mangolu hita dibagasan pos ni roha nang panghirimon na mangolu.

Hataridaan ni panomunomuonta di Minggu adven na paduahon on, sai rade ma hita hehe sian hagaleonta, sian halosohonta. Sipata boi do hita madabu tu hagaleon ni tondi nang haporseaon hinorhon ni borat ni boban ni ngolu on. Laos talpe hita tu pandelean, putus asa, frustrasi songon jolma na so marpanghirimon. Ngolunta on songon na so marlapatan, songon rapanrapan. Alai marhite panuriang Jesaya dipaingot hita asa tajangkon soara ni Tuhan i, na naeng pasahathon sangkap hatuaonNa di ngolunta. Rura ni hadabuantai naeng digohi marhite hata ni Debata asa boi hita hehe jala mangolu dibagasan semangat na imbaru.

Suang songoni ma ringkot ni haserepon ni roha di hita gabe hataridaan ni pangaradeonta dipanomunomuonta manjangkon harorona muse. Sipata diparngoluonta on ala balga ni pasupasu naung tajalo gabe mamboan huta tu haginjangon ni roha. Gabe jolma na lupa diri. Dina deba boi do madabu tu “kesombongan rohani” ala pangantusion na lipe di hasintongan ni hata ni Tuhan i. Parrohaon “na marbuntulbuntul nang dolok haginjangon ni roha ingkon parejeton. Mardongan hata ni Tuhan i, tolap do hita parejeton i asa mian ma haserepon i di hita. Di angka jolma na serep marroha, talup ma gabe hasahatan haluaon na sian Tuhan i. Amen...