Adven I Lukas 21, 25-36

 MINGGU, 1 DESEMBER 2024

ADVEN I

EVANGELIUM: LUKAS 21: 25-36

SAI JAGA MA JALA JUGULHON MARTANGIANG

Pdt. Tumbur Siahaan, S.Th

PATUJOLO

Masuhanta ma muse taon baru parhuriaon, adven parjolo. Hata adven on sian bahasa Latin, i ma “Adventus” artina “Kedatangan” (Ind.), “Haroro” (Btk.). Boi ma talapati ia Minggu Adven, i ma Minggu panomunomuon di haroro ni Kristus. Parjolo panomunomuon di ari haroroNa na paduahalihon (Eskatologis), paduahon i ma panomunomuon di ari parningotan hatutubuNa na gabe jolma. Minggu Adven I dohot na pa-II-hon mangarahon dompak pandang mata ni haporseaonta tu panomunomuon ari haroroNa na paduahon, jala Adven III dohot na pa IV-hon mangarahon dompak pandang mata ni haporseaonta tu panomunomuon di ari parningotan hatutubuNa, na gabe jolma di huta Betlehem lobi hurang 2000 taon naung salpu.

Hombar tu lapatan ni adven i, dienet do sian hatan ni Debata na gabe turpuk jamita, i ma jamita ni Tuhan Jesus uju di dolok Jetun. Dijamitai angka siseanNa taringot tu ari haroroNa na paduahalion. Asa diharingkoti angka sisean i pangaradeon diri, isarani hadungoon jala hahobason laho manomunomu ari haroroNa, na so pala dipaboa partingkianna, alai na pasti di sada tingki ingkon ro do Ibana muse hombar tu na binuhulNa. Jamita na marrumang “nubuat” / panurirangion on tong do manginona sahat tu ombas si nuaeng on, tu hita na gabe ruasNa. Disosoi do nang hita di ombas on asa sai dungo mardongan tangiang jala hobas. Sotung tarlalap binahen ni hinauli ni portibi on, laos tarihut jala tarihot ujungna madabu tu hadosaon. Gabe uhum nama jambar di ari haroroNa di ari panguhuman i.

HATORANGAN NI TURPUK

Dipaboa Tuhan Jesus di turpuk on hamamasa uju ari haroroNa i. HaroroNa napaduahalihon i dipatujolo marhite angka tanda di mata ni ari, bulan dohot bintang; nang tanda gabe hapusohan ma angka bangso jala bobonosan bahenon ni gasak ni laut i dohot galumbangna. Marhite angka tanda on dipaingot Tuhan i angka sisean i tu sada situasi nang kondisi na luar biasa. Hamamasa na luar biasa on manghorhon dua panghorhon. Panghorhon parjolo, adong jolma gabe tarhatos binahen ni hatahutonna. Panghorhon paduahon, i ma na pinangido sian angka na porsea i asa dirgak, pasindak ulu, ala nunga jonok haluaon i. Marhite panurirangion ni Tuhan Jesus di jamitana on, ia haroroNa na paduahalihon i sada kepastian na ingkon masa. Nang pe ndang dipabotohon sadihari taon, bulan nang arina. Holan angka tanda do dipabotohon jala haradeonta dipanomunomuon harorona na paduahalihon i do na rumingkot. Isarani asa sai dungo mardongan tangiang. Turpuk Lukas 21: 25-33 sarupa dohot na tarsurat di Mateus 24: 29-35 nang di Markus 13: 24-31. Sian tolu panurat evangelium on partanda sada jamita ni Jesus na tung mansai arga situtu na ingkon peopon jala sai dipahusorhusor dipardalanan ni ngolunta. “Anak ni jolma i” na nimaksud ni Jesus di turpuk jamita on, i ma dirina sandiri. Haroro ni anak ni jolma i dipatorang di turpuk on ndang adong na umboto taringot tu arina. Songon na nidok di Mateus 24: 36, “alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i; nda holan Ama i.”  Hahomion do taringot ari haroro ni Tuhan Jesus na paduahalihon i, alai dilehon do na gabe tanda. Asa marhite angka tanda i ma laos paingothon hita di ringkot ni pangaradeon diri.

Boi do nibandinghon songon parsiajaran di parsingkolaan, molo naeng mapultak simanabung sai jumolo do ditandai marhite masa lalo, angka mijur binatang sian tor i jala tamba mohop ni alogo humaliang ni tor i. Molo masa angka tanda sisongon i migor hobas ma laho sumisi tu inganan na asing mangalului parlinggoman. Suang songoni ma digombarhon taringot tu haroro ni Tuhan i. Alai angka tanda na tarsurat di buku ev. Lukas on ndang boi gabe parhitean ni jolma laho mambahen paretongan laho manontuhon ari hasusuda ni portibi on. 

Dibahen Tuhan Jesus do sada umpama asa ummura antusan ni sisean i lapatan sian jamita taringot haroroNa na paduahalihon. I ma umpama taringot hau ara, borhat sian pengalaman ngolu siapari angka partani. Umpama na mamboan pamingkirion ni angka sisean tu hamamasa naung ditanda nasida, isara ni pergantian musim (partaonan las). Di angka partani tontu mamoto partingkian na une molo maeng marsuan, manggotil dna. Jala angka na masa tu angka suansuanan isara ni ombas martunasi, marmutik, angka dekdek bulungbulung na.

Borhat sian hangongolu ni hau ara on, adong sada parsiajaran na arga na boi putihon. Molo pinaratehon hau ara uju martunas, botoon ni partani ma na lam jonok ari partaonan las. Asing sian partunason i, na ringkot muse pinaratehonon i ma parbuena. Ia parbue ni hau ara sasintongna ndang mardai. Alai molo denggan do dipauneune/ diolah parbue i, dipatupa gabe siinumon (minuman jus) boi gabe tabo daion. Sian proses manghobasi parbue hau ara on boi idaonta ia hamubaon i ndang mambahen substansina gabe malala, alai lobi sian i lam patoguhon karakterna. Proses transformasi ringkot do di hau nang parbue ni hau ara, ala hau ara nang parbuena dang boi memformat dirina sandiri secara maksimal. Suang songon i do nang ngolu ni jolma na porsea i, ingkon adong do proses transformasi laho maningkathon kualitas ni ngoluna.

Angka partani hau ara on, i ma pihak na mengintervensi hau nang parbue ni hau ara on. Angka partani on ma gombaran angka sisean i, nang angka na porsea i. partani na sukses ingkon adong diibana parbinotoan taringot ngolu ni suansuanan, taringot tu tano, iklim dna. Ingkon ringgas mamatamatai angka na nisuanna, na niulana. Asa molo songgop isara ni panahit boi pintor sigop maho mangubati. Lapatanna partani ingkon adong roha na sai hobas, dungo laho mamaratehon angka na niulana (Songon hata situatua: “Mata guru, roha sisean). Diarahon Jesus do angka sisean nang hita marhite turpuk jamita on asa songon pangalaho ni partani i ma hita. I do sada hataridaan pangaradeon ni dirinta, na sai dungo hita mardongan tangiang di na manomunomu haroro ni Tuhan Jesus na paduahalihon i.

Gombaran ni hau ara na martunas di turpuk on, marhahonaan tu ombas taon parasinirohaon, gok pasupasu (pat. Yoel 2:22), jala ndang marhahonaan tumhamagoan manang hageneon. Umpama ni Tuhan Jesus di turpuk on mangondolhon hagogok ni panobusion ni Tuhan i, na digohi uju haroro ni Tuhan Jesus paduahalihon. Nang pe panurat Mateus dohot Markus mandok hamamasa hamamago isara ni haleon nang lalo na gogo gabe sada tanda patujolo ni pambebeon i dope (Mateus 24: 8; Markus 13: 8), alai panurat Lukas ndang manurathon i. Panurat Lukas paandarhon jamita ni Jesus dibagasan sada pangantusion panghirimon na gok las ni roha, pat Luk. 21: 28 “alai molo mamungka masa angka i, dirgak ma hamu; pasindak hamu ma ulumuna, ai nunga jonok haluaonmuna.

”Umpama ni Tuhan Jesus on marujung marhite hata “Salpu pe sogot langit dohot tano on, anggo hatangki na so tupa salpu!” Lapatan ni hata on, ia jamita ni Tuhan Jesus on molo pe sada panurirangion nunga digohi di tingki naung salpu, (isarani hamamago ni bagas joro na di Jerusalem binahen ni soldade Rom di taon 70 M). Jamita na marrumang panurirangion on tong do marlangku di partingkian sisonari sahat tu ari haroro ni Tuhan i, na paduahalihon i. Haroro ni Kristus na paduahalihon, panghorhonna tu angka jolma na sai mangolu dibagasan dosa, gabe ari pamaloson/ hamamago. Alai di angka na satia manghaporseai Jesus, gabe ari na gok las ni roha, ari haluaon na gok.

Hombar tu naung nidok ni Tuhan Jesus na so adong nanggo sada jolma na mamoto andigan haroro ni Tuhan i, siala ni i diondolhon Tuhan Jesus di turpuk jamita on asa adong pangaradeon ni diri, ima hadungoon. Hadungoon laho manomunomu haroroNa i marhire na sai ringgas manjaha, manangihon nang pahusorhusor Hata ni Debata, dipanggulmiton ni ngolu siap ari. Molo dung songon i, tarida ma haporseaon nang ngolu naung marhaimbaruon. Di angka jolma sisongoni dao ma biar, ganggu nang lomos ni roha. Boi manahan di angka hinauli ni portibi on, na boi manaiti roha ni jolma i gabe tarlalap di hasonangan na so marimpola, laos madabu tu hadosaon. Ala somal do molo godang sinamot ni jolma, mamora dna, boi talpe tu pasonang-sonanghon pardagingon, isara ni parmabukon, parmainanon dna. I do naingkon sipamanathononta, asa di tingki parasianan on, huhut na paima-imahon haroro ni Tuhan i asa sai hot hita marhaporseaon na togu, dungo mardongan tangiang.

PANIMPULI

Sian jamita ni Tuhan Jesus di dolok Jetun on, sotung madabu jolma laho mambahen paretongan manontuhon ari haroro ni Tuhan na paduahalihon. Nunga adong piga-piga halak na manguji mambahen paretongan, parjolo sahalak na margoar William Miler (Parjamita sian Huria Baptis) mandok haroro ni Tuhan i i ma antara 21 Maret 1843 & 21 Maret 1844, adong hira-hira 100.000 na mangihuthon ibana, pola digadisi sude artana. Paduahon, sahalak na margoar Charles T. Russel (Na pajongjong Sekte Saksi Jahowa) ia haroro ni Tuhan i, i ma di taon 1914. Patoluhon, sahalak na margoar Harold Camping (Pandita sian The Family Radio) marhite channel Youtube mandok haroro ni Tuhan i, i ma ari 21 Mei 2011, pukul 6 sore. Didok ibana hira 3 % sian jolma na diportibi on (+/- 207 juta) langsung manaek tu banua ginjang. Tung sada sian angka peramal i tung so adong na terbukti. Ido umbahen didok ap. Paulus di 1 Tes. 5: 2, ia haroro ni Tuhan i tung songon panangko borngin do. Ndang adong na boi memprediksi.

Na ringkot marhite jamita ni Tuhan Jesus on, asa tongtong tapamanat sude angka na masa na niadopan ni angka jolma na porsea i boi lam patoguhon haporseaon, panghirimon nang patuduhon holong na sian Tuhan i. Sipata adong masa angka hal na luar biasa, adong lalo na mansai gogo, adong hagunturon parporangan antar bangso, masa nang pandemi Covid 19 piga taon naung salpu. Saluhutna angka na masa i naeng ma mamangkulingi haporseaonta asa lam pasolhothon dirinta, asa unang madabu tu ganggu nang lomos ni roha. Jolma na sai lomos jala ganggu i ma hataridaan na hurang pos ni roha di Tuhan i. Laos mura do angka jolma sisongoni tartait tu angkatahi ni sibolis na boi manegai ngoluna.

Marhite turpuk jamita on dipatorang Tuhan Jesus, ia masa pe angka tanda songon patujolo haroro ni Tuhan i, ndang mambahen hita tahuton, alai justru sabalikna pasunggulhon haporseaonta, asa sai dungo mardongan tangiang hita di na manomunomu ari haroro ni Tuhan na paduahalihon, manang sadihari pe masa i hombar tu tingki na binuhul ni Debata Ama i. Rajuman ni angka na porsea ma ari i songon ari na gok las niroha, ai disi ma digohi Tuhan i haluaon na gok tu angka na satia mangihuthon Kristus i saleleng ngoluna. Sai rade ma hita managam haroro ni Tuhan laho manggohi haluaon sipasahatonna tu hita, Amen.....