BAHAN SERMON HKI DAERAH I SUMATERA TIMUR I, MINGGU 02 PEBRUARI 2025
MINGGU IV DUNG EPIPHANIAS
EV. PSALMEN 71, 1 – 6 EP. HEBER 2, 14 – 18 PATIK I – X Ende Jam. 117:1-2
JAHOWA DO DOLOK BATU DOHOT PARTANOBATOANTA
(TUHAN ADALAH BUKIT BATU DAN PERTAHANAN KITA)
I. PATUJOLO
Psamen bindu 71 on, dang tarsurat ise na gabe panurat, alai mangida struktur bahasa na adong dibagasan, hira satolop do angka penafsir nang teolog Raja David do panurat ni psalmen on, uju dung matua ibana, dihagaleon ni pamatangna. Molo pinamanat di ay.3 hata “partanobatoan” manggombarhon konteks parporangan; ay. 22 hata “uninguningan”, “arbab”, manggombarhon konteks pemusik/ pencipta lagu; ay. 17 frasa “sai Ho do mangajari ahu sian sietehetehonhu” manggombarhon parsaoranna na denggan dohot Debata sian mulanai. Suang songoni ma judul ni turpuk on mansai patar songon na nialaman ni Raja David, disurathon “Tangiang Mangido Haluaon sian Musu”.
Tung borat do parniahapan ni Raja David lumobi di ujung ni harajaonna, di na lam matua pamatangna, hira na so adong tingki laho menikmati ngoluna songon na nihirim ni torop jolma, asa dung di hatuaonna boi menikmati masa tua. Alai molo raja David, hira manongtong do ibana bergumul mulai bangkit ibana gabe panglima porang Israel sahat tu na bangkit raja. Sian 1 Raja 1:5 dipabotohon angka Anakna sandiri memberontak laho merebut harajaon i sian ibana, isarani si Absalom nang Adonia. Suang songon i martamba dope manusai pikkiranna, dohot do angka ale-alena hian naeng merebut harajaonna, i ma angka anak ni Nai Seruya (2 Sam. 3: 39).
Sian saluhut boban ni ngolu i holan tu Debata do ibana mangalualu. Holan Jahowa nama na tuk laho paluahon ibana sian saluhut na mambibiari, na marsangkap laho mangago hosana, laho mangganti ibana songon raja ni Israel. Ai haru keluargana sandiri, nang angka dongan na saleleng on tardok “orang kepercayaanna” nunga marbalik gabe alona. Hira jolma na tarpunjung nama panghilalaanna, alai justru di situasi na songon i mangonjar ibana pasahathon sude na hinolsohonnai holan tu Jahowa. Tuhan Debata na sailaonnai satia margogoihon ibana dina manguluhon bangsoi jala na sai monang manaluhon angka musu ni Israel.
II. HATORANGAN
Tangiang do dalanna laho manjanghon pangurupion sian Tuhan i. Songon halak na porsea tontu nunga binoto ringkot ni tangiang i gabe sada hagogoon laho pajonokhon diri tu Tuhan i. Tangiang gabe media komunikasi ni jolma tu Tuhan i, tanda na denggan parsaoran na uli tu Debata. Parsaoran i manghorhon lam patoguhon pos ni roha, haporseaon nang panghirimon na mangolu asa sai marsigantung tu huaso hagogoon ni Debata. Nang pe godang jala borat boban ni ngolu, dang gabe lilu manang mangido pangurupion sian portibi on. Ala terbatas do hagogoon nang pangurupion na ro sian portibi on. Holan sian Tuhan Jahowa do na tuk paluahon jolma i, sian rante ni sibolis nang angka tangan ni parjahat na so manghalomohon jongjong hatigoran ni Debata.
71:1 Marhaporusan tu Ho do ahu, ale Jahowa, ndang tagamon murak ahu salelenglelengna
Sian ay. 1 on dipatuduhon adong haporseaon na togu jala marpangidoan holan tu Tuhan i. Tung dihaporseai parpsalmen do holan Debata Jahowa i do na gabe dolok batu nang partanobatoan. Prinsip ni ngolu na songoni nunga tarsuan mulai dung gabe parmahan ni dorbia ni amana si David on, sahat tu na gabe bangkita raja ibana. Jala dirajumi ibana do, monang pe Israel di angka parporangan na sailaon nai ala Debata do na campur tangan margogoihon/ mandongani. Borhat sian pos ni roha, prinsip no ngolu na songoni ma ibana, nang di hatuaonna i, dang tarurak ibana, dang sega ibana dung matua, alai hot marsahala, ala boi ibana gabe hapataran ni hamuliaon ni Debata.
Dipataridahon parpsalmen on do roha biar mida Jahowa, ido patauhon ibana laho mananda hatigoran nang hasintongan ni Debata. Manongtong do ibana sai marsigantung tu Tuhan i, umbahen sahat tu na matua pe ibana boi uli di ujungna. Tangkas ma tarida songon hasintongan ni Hata ni Debata, di angka jolma na sai biar mida Jahowa ingkon taruli pasupasu sian Tuhan i. Sahat tu pinomparna digohi ragam ni parpasupasuon dang gabe jolma pangido-ido (peminta-minta). Songon i ma nang prinsip ni ngolunta, songon naung pinataridahon ni parpsalmen on. Ngolu na sai mambahen Debata gabe dolok batu nang partanobatoanta, sahat ma pasupasu ni Tuhan i tu ngolunta asa sahat tu na saur matua marsahala, sahala na sian Tuhan i.
71: 2 Sai luahon ma ahu marhitehite hatigoranmu, jala palua ahu, sai paeleng ma pinggolmu tu ahu jala urupi ahu.
Sian ay.2 on, marisi tangiang parpsalmen taringot boha do angka dalan ni ngoluna tu joloan on. Asa dipalua sian tahi-tahi na jahat na ro sian humaliangna. Ai tung sogo do roha ni jolma na sai digolu roha portibion marnida jolma na jonok tu Debata. Dipangke sibolis i angka na adong di humaliang ni jolma na porsea i laho magunjuni asa madabu tu hadosaon. Sipata olo do dang mandukung lingkungan ni angka na porsea i. Di situasi na songon i mar psalmen mangido marhite tangiangna asa diluahon huhut dipalua sian tangan na angka parjahat i.
71: 3 Sai Ho ma gabe partanobatoan di ahu, tau inganan bongotanku tongtong; nunga pola diparbaga Ho urupanmu ahu, ai Ho do partanobatoanku jala haporusanku.
Sian ay.3 on dipatorang paboa Tuhan i gabe partanobatoan, inganan parlinggoman sian musu. Sada gombaran/ umpama do on laho patuduhon sada inganan na timbo jala na togu na maringanan dompak ginjang . Dipangke parpsalmen on do gombaran on laho patuduhon hahuasaon ni Debata na so tarasam i, dang adong huaso na asing na boi mangimbangi huaso ni Tuhan i. Molo nunga ditotophon Debata sada hatontuan laho paluahon naniasianNa, tung so adong do na tuk laho manundati. I ma hataridaan ni hatigoranNa nang hahuasoonNa na so adong na boi mangimbangi. Dang adong na boi manundati sangkap hatuaon ni Debata na ingkon masa di angka na niasianNa i, sian jolma, alam nang sibolis pe.
71:4 Ale Debatangku, sai palua ma ahu sian tangan ni parjahat i, sian tangan ni pargeduk dohot sibahen gogo.
Sian ay. 4 on, sarupa tu ay. 2 mangido asa tong dipalua sian angka tangan ni parjahat, sian tangan ni pargeduk dohot sibahen gogo. Diulangkon parpsalmen on pangidoanna pola dua hali manggombarhon parsitutuonna di na mangido pangurupion na sian Tuhan i. Jolma sipargeduk ima jolma ma so tumanda Debata, na marpangalaho na jungkat. Dang alang rohana laho mamunu donganna jolma, siala ni i gabe sai dihabiari jolma sipargeduk on. Parngoluon ni jolma sipargeduk on digombarhon songon pangisi ni huta Kanaan na dilengsehon si Josua dohot bangso Israel uju i. Nasida ma angka sipelebegu, angka na jahat, na lomo roha mamunu, na torop ripena, na lomo roha mangalangkup. Ala angka pangalaho sisongoni ma diparenta Debata si Josua dohot angka soldaduna mangaripashon pangisi ni huta Kanaan i.
Nang sahat tu partingkian sisonari pe, sai adong juo do jumpa pangalaho sisongoni. Sipata jumpang do angka pangalaho sisongoni di humaliang ni angka na porsea i. Di situasi na songon i ma ringkot adong sada prinsip ni ngolu songon naung pinataridahon parpsalmen on, na sai ungkap rohana laho mangido pangrupion sian Tuhan i, asa dipargogoi jala dang gabe terpengaruh, tarihutihut tu pangalaho na adong dihumalianta. Ala ni i ringkot ihuthononta songon ngolu ni parpsalmen on, na sai mangolu dibagasan tangiang, jala parsaoran na denggan dohot Debata, na gabe hagogon laho mangadopi angka parjahat i.
71: 5 Ai Ho do pangkirimonku, ale Tuhan Jahowa, nalom ni rohangku sian sietehetehonku.
71:6 Naung mangunsande tu Ho do ahu sian bortian, Ho do siparmudu ahu sian butuha ni dainang, sai Ho do tongtong pujionku.
Sian ay. 5 – 6, tarida beha do panindangion ni parpsalmen on; ngolu ni panghirimonna nang haporseaonna na togu i. Didok sian bortian ni dainang nunga Debata na gabe pangunsandeanna, jala holan Debata do na tau sipujionna. Sian panindangion na songon i, tangkas ma tarida na so hea ibana sirang sian gonggoman ni Tuhan i, jala ido na pinangasahonna dang tahuton be ibana nang pe dung matua; gale pardagingon, dang margogo, rambon mata, nengel nang parbinegean. Alai dihaposi parpsalmen satia do Debata laho marmuduhon ibana.
Di parngoluon on, jotjot do tarbege molo dung matua jolma i, boi sajo gabe boban ni pomparanna. Torop do angka naung matua dianggap gabe boban ni pomparanna, sipata olo lam martaba sitaonon ni angka jolma uju di hatuaonna. Di na deba sahat tu naso dipardulihon angka gellengna angka natorasna naung matua i, hira tarpunjung, dang dipardulihon be natorasna naung matua i. Marsiajar sian parpsalmen on dang mabiar ibana dihatutuana i, ala dang manghirim ibana sian parpambahenan ni jolma/ pomparanna, alai holan sian Debata do ibana manghirim, asa diparmudu Debata uju di hatuaonna i.
Dihasusuda ni gogo uju di hatuaon i, manghirim asa Debata ma na mangabing-abing, songon poso-poso na sai niabing ni inana. Sonang panghilalan ni poso-poso i molo dung diabing inana. Songon pandok ni Jahowa di Jesaya 46:4 “Sahat rodi hatutuamu sai tongtong do Ahu, jala rodi na ubanon sai Ahu do mambahensa na sai laon, Ahu do mangompa, Ahu do mangabing jala Ahu paluahon nuaeng.” Tontu sude do hita manghirim taruli di panarihonon ni Debata, na sai marmudu hita. Saluhutna natahirim i sai adong do kaitanna tu hasatiaonta sahat tu ujung ni ngolunta mambahen Debata gabe dolok batu nang partanobatoanta. Unang mardua roha, unang manimbil tu siamun nang hambirang, alai gomos tapeop jala marpos ni roha marhaporseaon tu Jahowa Debata sambing.
III. Sipahusorhusoron/ Refleksi
Marnida hatuaon i, boi taida sian dua sudut pandang, parjolo sudut pandang pardagingon. Hatuaon na patuduhon hagaleon ni pamatang; lam suda gogo, rambon parnidaan, nengel parbinegean sahat tu na talpe tu hamatean. Lumobi molo sai adong dope na manusai, na naeng mangagohon hosa sian humaliang, sian angka parjahat. Situasi na songon i na niadopan ni jolma; molo dao sian Tuhan i, boi do lam manambai sitaonon. Paduahon, sian sudut pandang partondion, justru molo lam matua jolma i, binoto lam suda gogo, lam mandao angka dongan, alai molo denggan do parsaoran dohot Tuhan i, lumobi molo sian sihetehetehonta laos boi do patubuhon panghirimon na mangolu jala haporsean na togu asa lam mangasahon hagogoon na sian Tuhan i. Songon naung pinabotohon ni parpsalmen di turpuk jamita on, gabe uli ma di ujung ni ngolu i, ala Debata na satia i hot marmudumudu, manjagai huhut mangalehon haluaon. Ujungna sonang ma ngolu dibagasan pangaramotionNa i.
Ngolu na songon i ma naeng jumpang di hita ganup marsadasada. Asa sian naung mananda roha jolmai (sian sihetehetehon) sahat tu na matua, dang hea lingkang, holang sian parsaoran dohot Debata. Boi ma adong sada prinsip ni ngolu holan Debata do na gabe dolok batu nang partanobatoanta, asa nang pe matua daging on, alai molo semangat marhaporseaon, marpanghirimon lumobi holong tu Debata, manongtong margogo, songon gogo ni angka naposo. Badan boleh tua, tapi semangat berTuhan tetap muda..... Amin...
Pdt. Tumbur Siahaan
HKI Tomuan Dolok/ Resort Gunung Maria, 27 Jan. 2025.
Tidak ada komentar:
Posting Komentar